نلتر 16 میگاواٹ ہائیڈرو پاور یکم نومبر تک مکمل کرکے گلگت شہر کے لیےبجلی کی فراہمی کو یقینی بنانا ہوگا، وزیراعلیٰ
گلگت۔ وزیر اعلیٰ گلگت بلتستان حاجی گلبر خان نے 16میگاواٹ ہائیڈرو پاور پروجیکٹ نلتر پر جاری کام کا جائزہ لینے کے حوالے سے اعلیٰ سطحی اجلاس کے موقع پر گفتگو کرتے ہوئے کہا کہ گلگت کیلئے یہ منصوبہ انتہائی اہمیت کا حامل ہے۔ بجلی نہ ہونے کی وجہ سے گلگت کے عوام کو شدید مشکلات کا سامنا ہے۔ سردیوں میں بجلی کا مسئلہ مزید سنگین ہوگا لہٰذا اکتوبر 2024ء کے ٹائم لائن کو یقینی بناتے ہوئے یکم نومبر کو اس منصوبے سے گلگت کیلئے بجلی کی فراہمی ممکن بنایا جائے۔ ایچ ایم سی قومی ادارہ ہے، 16 میگاواٹ ہائیڈرو پاور پروجیکٹ نلتر کا منصوبہ ایچ ایم سی نے مکمل کرنا ہے۔ قومی ادارے پر عوام کے اعتماد اور گلگت کے عوام کو بجلی کی فراہمی کے حوالے سے درپیش مشکلات کو مدنظر رکھتے ہوئے اس منصوبے کی ٹائم لائن کے مطابق تکمیل کیلئے مختلف شفٹس پر کام کا بندوبست کیا جائے۔ 16 میگاواٹ پاور پروجیکٹ میں مزید تاخیر کی گنجائش نہیں ہے۔ ٹی جے سیٹ، ٹرانسمشن لائن سمیت سول ورک کی تکمیل کو ہر صورت ٹائم لائن کے مطابق مکمل کیا جائے۔ وزیر اعلیٰ نے اس موقع پر سیکریٹری برقیات کو ہدایت کی کہ 16 میگاواٹ پاور پروجیکٹ پر جاری کام کے حوالے سے روزانہ کی بنیاد پر رپورٹ وزیر اعلیٰ سیکریٹریٹ میں پیش کریں۔ اجلاس میں ایم ڈی ایچ ایم سی، سیکریٹری برقیات سمیت متعلقہ اعلیٰ آفیسران نے شرکت کی۔ اجلاس میں 16میگاواٹ پاور پروجیکٹ کی رفتار کے حوالے سے پروجیکٹ ڈائریکٹر نے تفصیلی بریفنگ دی۔
